I. Исхода чтение:
Поят Моисей сыны Израилевы от моря чермнаго, и веде тыя в пустыню сур: и идяху три дни в пустыни, и не обретаху воды, да быша пили. Приидоша же в мерру, и не можаху пити воды из мерры, горька бо бе: сего ради наречеся имя месту тому, горесть. И роптаху людие на Моисея, глаголюще: что пием; Возопи же Моисей ко Господу, и показа ему Господь древо: и вложи тое в воду, и сладка бысть вода. Тамо положи ему Бог оправдания и суды. И тамо искушаше его, и рече: Аще слухом услышаши глас Господа Бога твоего, и угодная пред ним сотвориши, и внушиши заповеди Его, и сохраниши вся оправдания Его, всяку болезнь, юже наведох египтяном, не наведу на тя: аз бо есмь Господь исцеляяй тя. И приидоша во Элим, и бяху тамо дванадесять источников вод, семьдесят стеблий финиковых: и ополчишася тамо при водах. И воздвигошася от Элима, и прииде весь сонм сынов Израилевых в пустыню Син, яже есть между Элимом и между Синою.
объяснение:

II. Притчей чтение:
Сыне, не пренебрегай наказания Господня, ниже ослабевай от него обличаемый. Егоже бо любит Господь, наказует: Биет же всякого сына, егоже приемлет. Блажен человек, иже обрете премудрость: и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, не сопротивляется ей ничтоже лукавое, благоразумна есть всем любящим ю: всякое же честное недостойно ея есть. Долгота бо жития, и лета жизни в деснице ея. В шуйце же ея богатство и слава: из уст ея исходит правда, закон же и милость на языце носит. Путие ея путие добры, и вся стези ея с миром. Древо живота есть всем держащымся ея, и восклоняюшымся на ню, яко на Господа, тверда.
объяснение:

III. Пророчества Исаиина чтение:
Сия глаголет господь: отверзутся врата твоя Иерусалиме выну день и нощь, и не затворятся, еже ввести к тебе силу языков, и цари их ведомыя. Языцы бо и царие, иже тебе не поработают, погибнут: и языцы запустением запустеют. И слава ливанова к тебе приидет в кипарисе, и певге, и кедре вкупе, прославити место святое Мое, и место ног моих прославлю. И пойдут к тебе боящеся сынове смиривших тя, и прогневавшех тя, и наречешися град Господень, сион святаго Израилева. За еже быти тебе оставлену, и возненавидену, и не бе помогаяй тебе: и положу тя в радость вечную, веселие родом родов. И иссеши млеко языков, и богатство царей снеси, и разумееши, яко аз господь спасаяй тя, и избавляяй тя Бог Израилев.
объяснение: